ភ្នំពេញ៖ នាយករដ្ឋមន្ត្រីកម្ពុជា សម្តេចតេជោ ហ៊ុន សែន បានណែនាំឱ្យវិទ្យាល័យសម្តេចតេជោហ៊ុន សែន សំពៅលូនកែតម្រូវនូវវិន័យសាលាដោយមិនគួរកាត់សក់ ឬឈូសសក់សិស្សទាំងដែលសិស្សមានសក់ខ្ចី និងមានរបៀបរៀបរយត្រឹមត្រូវ។
ថ្លែងក្នុងពិធីប្រគល់សញ្ញាបត្រជូននិស្សិតជ័យលាភីនៃសាកលវិទ្យាល័យវេស្ទើនចំនួន៣២៣២នាក់ នាព្រឹកថ្ងៃទី២៦ ខែមករា ឆ្នាំ២០២៣ សម្តេចបាននិយាយដូច្នេះថា៖«បើយើងចង់តម្រូវ មិនចាំបាច់ទៅយកកន្ត្រៃត្រង់ដឺទៅឈូសសក់គ្នាកណ្តាលថ្នាក់អ៊ីចឹងទេ កូនសិស្សរបស់យើងដូចកូនរបស់យើងអ៊ីចឹង រៀបចំកាត់សក់ឱ្យសិស្សទៅប្រសិនមានកន្ត្រៃត្រង់ដឺដែរនោះ»។
សម្តេចតេជោ បានសម្តែងការហួសចិត្តចំពោះគ្រូដែលកាត់សក់សិស្ស ទាំងដែលសក់គ្រូវែងជាងសក់សិស្សទៅទៀត។
សម្តេចនាយករដ្ឋមន្ត្រីបានស្នើឱ្យខាងសាលាកែឥរិយាបថនៃការអនុវត្តវិន័យសាលាមួយនេះ ដោយគួរតែណែនាំពួកគេឱ្យទៅកាត់សក់ឱ្យបានត្រឹមត្រូវវិញ៕
